Iha data 15 Janeiru 2021 Gabinete Garantia Kualidade saude kompostu husi Diretor, Chefes no staf sira hotu halao soru mutuk revizaun anual ba progresu atividades GGQS durante 2020 nia laran. Iha enkontru revizaun progresu anual refere, Diretor GGQS Interino Dr. Helder Mendonca de Carvalho, hateten katak GGQS iha ninia komitmentu no ambisaun atu alkansa saida mak deskreve ona iha livru planu estratejia melloramentu kualidade saude, Nune’e ezizensia importante maka Diretor, Chefes no staf hotu iha GGQS presija enkoraja an, fortalese servisu ekipa (Team Work) ne’ebe diak liu tan hodi alkansa misaun ne’ebe trasa ona iha planu GGQS nian 2021 hodi atinji objetivu melloramentu kualidade prestasaun servisu. Progresu bo’ot ida ne’ebe GGQS atinji ona iha tinan 2020 maka desenvolve ona Planu Estrategia nasional melloramentu kualidade saude. Hahu tinan 2021 ba oin planu no atividades GGQS nian sei deseña modelu ida ne’ebe mak refleta ba konseitu ne’ebe deskreve iha Planu estratejia ne’e nia laran no oinsa atu institusionaliza konseitu melloramentu kualidade tun to nivel fasilidade saude sira.
